المتهم الرابع (أهل العروسة)ء

بسم الله الرحمن الرحيم،
محكمةةةةةةة،
المتهم الرابع (أهل العروسة)
الإدعاء:
أنتم متهمون بالتسبب فى تأخر سن الزواج فى مصر عن طريق المغالاة فى المهور و تعجيز الشباب الذكور و تقيميهم ماديا فقط.

الدفاع:

سيدى القاضى،
حضرات المستشارين و القارئين،
إن محاولة تأمين مستقبل الفتاة شئ مشروع و لا يختلف عليه إثنان، لذلك فإن أهمية المقدرة المادية للعريس تطغى على بعض الأمور الفرعية مثل الأخلاق و التدين و الكلام ده،
لإنهم مش هايسكنوا فى الأخلاق و ياكلوا تدين و يحلوا بقهم بالكرم.
يجب أن نكون واقعيين سيدى القاضى،
من يبدأ صغيرا،،،،، يظل صغيرا
لكن من يبدأ كبيرا،،،،، يكبر أكتر
لا بأس أن يكون العريس متدينا و عارف ربنا،
لكن الأهم، هل يقدر على فتح بيت أم لا؟
و إذا كان يتم إتهام موكلى بالمغالاة فى المهر، فماذا يفعل و كل من حوله من الناس لا يقبلون بأقل من ذلك؟
يعنى يبيع بنته بالرخيص؟؟
لازم العريس يتعب و يتشحطط عشان يعرف إنه بياخد جوهرة، غالية، و قد كلفت موكلى وقتا و مجهودا و أموالا حتى تمكن موكلى من تربيتها أحسن تربية و تعليمها أحسن علام،
و اللى بيجى بلاش ،،،، بيروح ببلاش
لذلك تقرر إن أى حد هايرخص فى مهر بنته، هو اللى يستحمل اللى هايجرا لبنته لو العريس طلع قليل الأصل، و هذا أصبح القاعدة اليومين دول.
عملا بمبدأ، إحنا بنشترى راجل، بس يكون جاهز.
فإن تقييم العرسان الذكور يكون بكل شئ: أخلاق، تدين، لكن أهمهم الماديات،
لأن موكلى لا يريد لإبنته أن تتشحطط و تسف التراب، بل يريدها معززة مكرمة.
و العرف بيقول القايمة على العريس كمان.
---------
لكن ليس كل ما يتمناه المرء يدركه؛
ونتيجة للظروف المادية اللى زى الزفت، قرر موكلى أن ينتظر حتى يتقدم عريس جاهز، و لا يظن أى منصف أن قلة العرسان الجاهزين مبررا إنه يبيع بنته بالرخيص،
و الجواز ده فى النهاية،
"قسمة و نصيب"
---------------------
بالطبع هناك قلة قليلة مندسة من أهل العروسة، قاموا بخيانة العهد و تقليل المهور و تيسير الزواج، لكن مشكلة عرسان اليومين دول إنهم غاويين إستسهال، و لما بيلاقوا عروسة أهلها متفاهمين بيحاولوا يستنطعوا و يسترخصوا أكتر،
لذلك قد أثبتت التجارب على ذكر و إنتى المصرى،
أنه لا المغالاة نافع و لا التيسير نافع
لذلك نعود من حيث بدأنا،
عشان مايبقاش موت و خراب ديار، لو طلع العريس ندل و مكانش دفع حاجة،
و لو طلع الولد كويس أهم عايشين و المال مسيره ليهم بعد عمرين طوال
و لو طلع ندل أهو يكون دفع حاجة تصبر البنت و أهلها على ندالته

أهم حاجة الستر، و الستر بالفلوس أهم أنواع الستر،
لذلك يدفع الدفاع بأنه لا يمكن التساهل أكتر من ذلك مع العرسان،
و قطيعة ،،،،، محدش بياكولها بالساهل سيدى القاضى.